काठमाडौं। प्रधानमन्त्री माधवकुमार नेपालले प्राथमिक र आधारभूत स्वास्थ्यलाई जनताको मौलिक हकका रूपमा सुनिश्चित गरिने बताउनुभएको छ।  
नेसनल मेडिकल कलेज, वीरगन्जको उद्घाटन गर्दै प्रधानमन्त्री नेपालले धनी र गरिबका लागि आधारभूत स्वास्थ्यसेवामा समानता हुनुपर्नेमा जोड दिनुभयो।  
 

त्रिभुवन विश्वविद्यालयका कुलपतिसमेत रहनुभएका प्रधानमन्त्री नेपालले गरिबीको रेखामुनि रहेका आम नेपाली जनताले अझै पनि झाडापखाला, रुघाखोकी र ज्वरोजस्ता सामान्य उपचारजन्य रोगबाट मृत्यु भोग्नुपरिरहेको तथा मुटुरोग, क्यान्सरजस्ता खर्चिलो उपचार पद्धतिमा अहिले पनि उनीहरूको सहज पहुँच हुन सकिराखेको छैन भन्नुभयो।  
उहाँले त्यस्ता गरिब र दुर्गम क्षेत्रका जनताका लागि स्वास्थ्यसेवामा सुलभ र सहज पहुँच बनाउन ग्रामीण स्वास्थ्यमा लगानी वृद्धि गरिने बताउनुभयो।